Добивај вести на Viber
Тешки метали, носени до тиња и вода од оштетеното јаловиште на некогашниот рудник во Костајник кај Крупањ, стигнале во реката Јадар во регионот на Лозница.
Резултатите од анализата на Агенцијата за заштита на животната средина покажуваат големи концентрации на железо, манган, арсен и кадмиум во оваа река, а постои можност преку Јадар опасните материи наскоро да стигнат и во Дрина и во Сава.
Според експертите, ова ќе претставува огромна еколошка опасност за Белград и за цела Србија.
Присуството на тешки метали во речните води одговара на високо загадена вода од четврта и петта категорија, заради што е потребна итна реакција.
Излевањето на токсичните материи од јаловиштето на некогашниот рудник за антимон започна по мајските поплави во Србија, кога дошло до оштетување на заштитната брана.
„Ако по два месеца од пукањето на браната, опасните материи во високи вредности стигнале до Јадар, тоа значи дека тие наскоро би можеле да се најдат во Дрина и Сава. Ова е тревога за целата област, но и за Србија и затоа треба што поскоро нешто да се преземе“, апелира членот на Градскиот совет на Лозница задолжен за заштита на животната средина Драгослав Добриќ.