Добивај вести на Viber
Премиерот Груевски го пушти во употреба, од општина Струмица реагираа, ВМРО врати. Локалниот пат Струмица - Попчево ги скара патриите, ги збуни селаните.
„Струмица и градоначалникот и лидер на СДСМ, Зоран Заев, станаа „ноќна мора“ на премиерот Груевски. Не само што Груевски денеска ја крстареше Струмица, по бањи и игралишта, ставаше камен темелник, туку отиде дотаму што сечеше лента на локален пат. При тоа станува збор за проект што не е владин. Патот Струмица – Попчево, што го пушти Груевски во употреба е проект на општината Струмица и Светска банка“, стои во реакцијата од општина Струмица.
Од општина Струмица велат дека општината потрошила над 7 милиони денари за експропријација на земјиштето, за да може да се изгради патот, па затоа го прашуваат премиерот, како тогаш патот Струмица – Попчево е владин проект и зошто не бил поканет ниту еден претставник од општината.
Реагираа од владејачката партија од каде велат дека локалниот пат е изграден од Агенцијата за државни патишта со средства кои што подоцна ќе се исплаќаат од Буџетот на Република Македонија.
„Заев и СДСМ прават исто како и Александар Петревски во Охрид, кои исто така се фалеше со патишта кои што ги има изградено Владата и жалиме што Заев тргна по тој пат, со лаги и манипулации. Зоран Заев е ангажиран само да си ги наполни џебовите на семејството Заеви. Заев освен епитетот малиот Бранко може да го носи и епитетот струмичкиот Александар Петровски со кого освен криминалот и непотизмот како заеднички особини ги имаат и начинот на изразување, фондот на зборови и начинот на склопување на речениците“, стои во реакцијата од ВМРО - ДПМНЕ.
Локалниот пат ја поврзува Струмица со селата Попчево, Рич и Белотино. Патот е долг 6 километри и чини околу 615 илјади евра.