Најава за 250 нови вработувања во Кичевско

Добивај вести на Viber

Рудникот за манган „Стогово“ во Кичево наскоро треба да почне со работа, а веќе се прават засилени подготовки за неговото отворање. „Во потрага сме по странска компанија со која би можеле полесно и побрзо да најдеме пласман за нашата руда, која моментално е доста барана на светскиот пазар. Постои интерес од повеќе странски компании, но како фаворит за кооперантски однос се наметнува американско-канадска компанија со долгогодишно искуство во областа на рударството“, вели директорот на „Тајмиште“Владо Толески, за Нова Македонија. Како што пишува весникот, отворање на рудникот за манган „Стогово“ е важно за Кичевскиот регион бидејќи ќе се вработат околу 250 лица од разни профили. Исполнети се сите предуслови за почеток на работата во овој рудник и се очекува во првата половина на февруари најдобриот понудувач на тендерот, акционерското друштво „Тајмиште“ од Кичево, да ги уплати понудените 780.000 евра и да го потпише концесискиот договор во траење од 30 години. Истовремено, од компанијата бараат и фирма што ќе врши збогатување на концентратот на рудата во новоотворениот рудник. „Од досегашните истражувања што ги вршевме и пред дваесетина години и денес, потврдено е дека концентратот од Стогово е со содржина на манганова руда од 24-25 отсто. За да биде конкурентна на светскиот пазар, потребно е рудата да биде со повисока концентрација на манган, а тоа значи процентот барем двојно да се зголеми и да изнесува минимум 50 отсто“, вели Толески за Нова Македонија.