Најави за инвестициски бум и развој на туризмот во Дојран

Добивај вести на Viber

Од мало погранично место, Дојран ќе прерасне во вистинска дестинација за одмор и рекреација, но место за влез на инвестиции, најави денеска градоначалникот на Дојран, Борче Стамов. Тој се пофали со досега сработеното и ги најави и идните проекти, споменувавајќи ја новата канализација, реконструкција на пречистителната станица, уредување на просторот наменет за пазар во Стар Дојран, новото пристаниште со капацитет од 16 чамци.

„Посветивме големо внимание на уредувањето на брегот на Дојранското Езеро, со наши средства комплетно ја реновиравме плажата Калдрма во Нов Дојран, а исчистивме и отворивме простор за две нови плажи во Стар Дојран. Во тек е објава за прибирање на идејни решенија за две нови плажи, едната во должина од 500 метри, а друга 100 метри, кои треба да бидат готови за наредното лето“, изјави Стамов и додаде дека еден од нивните најзначајни проекти е отварањето на фронтовата линија, која ќе претставува своевиден музеј на отворено на Првата светска војна.

Тој додаде дека во соработка со Армијата на Република Македонија почнати се активности на уредување на теренот до бункерите и рововите од тој период,  акција која ќе трае неколку години, а веќе привлекува туристи и гости од странство.

Тој информираше заедно со збратимената општина Чекмекој од Истанбул, заеднички ќе се реконструира старата Саат-кула во Дојран. Исто така најави дека во финална фаза се 9 урбанистички планови со општина Дојран како плановите за туристичко развојни зони 1 и 2, помеѓу Нов и Стар Дојран наменет за викенд куќи, планот за Сретеново и Карач, каде се предвидени локации за помали и поголеми хотели и авто-камп, план за голф терен и спа центар, две локации за винарии, а при крај е и планската документација за индустриската зона Душаново.