Најуспешниот македонски ракометен селектор ќе гради фотоцентрала

Добивај вести на Viber

Звонко Шундовски, најуспешниот некогашен селектор на македонската ракометна репрезентација, реши да инвестира во бизнисот со електрична енергија и да гради фотонапонска централа.

Ракометниот тренер од Битола не прецизира дали станува збор за проект кој потоа треба да премине кај друг сопственик, но најавува фотоцентрала со прилично голем капацитет од 1 до 2,3 мегавати, во зависност од можностите и условите.

- Проектот е во почетна фаза, се уште правиме почетни анализи. Во овој момент немам конкретни информации кои би ги споделил со јавноста. Со задоволство би одговорил кога ќе имаме поконкретни активности, ни изјави ракометниот стручњак.

Претпријатието кое ќе стои зад централата е основано минатата недела под името Сан-Сајд ФТЦ од Битола, а покрај Шундовски, сопственик на проектот е и енергетскиот консултант од Скопје, Константин Сидеровски.

Поранешниот селектор на македонската ракометна репрезентација до 2021 го предводеше познатиот ракометен клуб Ал Рајан од Катар. Шундовски е селектор кој го постигна најголемиот успех со репрезентацијата на Македонија и тоа на Европското првенство во 2012-та година кога беше освоено петтото место.

Шундовски претходно беше тренер на Пелистер и Металург, потоа романски ЧСМ Букурешт и Констанца. Едно време беше и селектор на селекцијата на Израел.

Во Македонија во последно време тренд е да се инвестира во проекти со фотоцентрали, . Фудбалскиот тренер Александар Влахо и поранешниот фудбалер Бесим Речи се сопствениците на проектите за изградба на три фотосоларни централи кои ги продава на израелскиот гигант Big Shopping Centers, познат по тоа што купува недвижнини на Балканот и поседува трговски молови во регионот.