Фудбалски тренер од Македонија им продава соларни централи на Израелци

Добивај вести на Viber

Фудбалскиот тренер Александар Влахо и поранешниот фудбалер Бесим Речи се сопствениците на проектите за изградба на три фотосоларни централи кои ги продава на израелскиот гигант Big Shopping Centers, познат по тоа што купува недвижнини на Балканот и поседува трговски молови во регионот.

Big Shopping Centers, холдинг претежно во дејноста на недвижности со активности во САД, Израел, Србија, Црна Гора и Франција и лидер во изградба и развој на концептот на трговски центри на отворено во Израел, преку БИГ Енергиа Холдингс ги купува централите на Влахо и Речи познати како Бака Енерџи, Чашица Солар и Скај Солар.

Сите три се во околината на Пробиштип. Во изминатите години Big Shopping Centers и БИГ Енергиа Холдингс, инвестираат во секторот на електрична енергија. Според известувањето на Комисијата за заштита на конкуренција, тие веќе поседуваат една фотоцентрала во Штип - БИГ МЕГА Македонија - Штип Солар Оне, која е во фаза на развој. Комисијата сепак има резервирано мислење за ваквата концентрација, бидејќи може да ги наруши пазарните принципи на конкурентност.

Влахо вели дека деновиве има интензивни посети во Македонија на сопствениците од Израел и дека до март треба да им го предаде сопствеништвото, по што тие би продолжиле со понатамошната изградаба на проектите. Тој додава и дека интензивно се соработува и со локалната самоуправа на Пробиштип.

- На овие проекти почнав да работам уште пред четири години, а во предвидениот рок треба да ја обезбедам логистиката, во смисла на лиценци, дозволи за градба и потврди, по што соларните централи ќе преминат во целосна сопственост на инвеститорите. Сите три централи ќе имаат моќност од 110 мегавати, што е капацитет колку еден блок од РЕК Битола, а годишно треба да се продаваат 190.000 мегаватчасови електрична енергија. На Израелците ќе им преостане да ги опремат централите и понатаму да им ја продаваат струјата на домашните потрошувачи, ни изјави Влахо.

Big Shopping Centers  на крајот од изминатото лето соопшти дека презема проект во Македонија вреден 53 милиони евра. Проектите треба да се градат на нешто помалку од 130 хектари земја. Беше објавено и дека откупот на уделите на проектните компании ќе се врши во фази. 

Врз основа на очекуваниот капацитет, компанијата проценува бруто добивка од продажба на електрична енергија на 7,9 милиони евра за првата година од работењето. Сумата се заснова на продажна цена од 70 евра за продаден мегаватчас за времетраење на проектот од минимум 25 години.

Во меѓувреме објавено е дека уште еден израелски гигант - Ел-мор ќе гради фотонапонска централа од 100 мегавати во околината на Штип со влог од повеќе десетици милиони евра. Фотоцентралата ќе се вика Сушево 1, а и во овој случај инвеститорот како партнер има домашна проектна компанија.

Со енергетската криза во тренд е проектни компании да им продаваат фотоцентрали во развој на покрупни инвеститори. Таков пример се и двете фотоцентрали во Куманово и Крива Паланка што ги продаде Трајче Ангеловски.

Александар Кузмановски