„Не ја разбирам оваа масовна хистерија“: Сепак Груби го откажа концертот на плоштад

Добивај вести на Viber

Откажан е големиот концерт кој требаше да се одржи по повод прославата на 20 години од Охридскиот рамковен договор, потврди денеска првиот вицепремиер и министер за политички систем и односи меѓу заедниците Артан Груби. Сепак останува да се одржи прослава во хотел каде се предвидени да присуствуваат околу 200 луѓе. Откажувањето следува по бурните реакции за одржувањето на прославите поради зголемувањето на бројот на заболени, а во време кога се носат мерки за заштита и нови ограничувања. Груби вели дека реакциите се масовна хистерија која не ја разбира. Концертот требаше да биде вечерта на 13 август. Груби денеска присуствуваше на панел дискусија во Тетово  “По две децении, дали Рамковниот Договор е тесен за
едно општество целосно отворено и еднакво“ организирана од страна на
Универзитетот на Југоисточна Европа во рамките на програмата на
активностите за одбележување на 20 годишнината на Охридскиот рамковен
договор.

„Сите настани и денешниот се согласно протоколи за Ковид и централниот настан во хотел Александар Палас на 13 август ќе биде во сала која собира 1500 луѓе а ќе присуствуваат не повеќе од 200 луѓе кои ќе носат маски, ќе бидат со оддалеченост поголема од 1,5 метар еден од друг, мерење на температура пред влезот. Затоа не ја разбирам оваа масовна хистерија по социјални мрежи. Се надевам дека не се однесува на Охридскиот рамковен договор и на неговата имплементација туку е навистина е загриженост на сите тие околу здравствените протоколи, рече вицепремиерот Груби.

Вчера тврдеше дека на 13 август ќе има спектакуларен концерт на оперскиот пејач Раме Лахај со македонската филхармонија.

„Спектакл во Скопје со ограничени места поради пандемијата и протоколите пропишани од здравствените власти. Заинтересираните за учество да испратат барање во инбокс или да се јават на: +38923143100. Слободните места ќе бидат пополнети според редоследот на барањата“, објави Груби.

Инаку, во петок во Александар Палас ќе се одржи централната прослава по повод 20 години од Рамковниот договор, на која ќе присуствуваат гости од земјава и странство.