Неколку хотели треба да се градат во Скопје – инвеститорите никаде ги нема!

Добивај вести на Viber

Откако Владата реши државното градежно земјиште за изградба на хотели да го продава по почетна цена од едно евро за метар квадратен, локални бизнисмени но и странски компании побрзаа да ги купат повеќето од слободните локации. Но, ако истите почнеа на време да градат, Скопје сега требаше да има минимум десеттина нови и луксузни хотели. Засега, локациите се уште празни ги чекаат своите инвеститори. Хотелиерскиот бизнис стана особено атрактивен во земјава откако Владата реши државните градежни парцели да ги продава со почетна цена од само едно евро за метар квадратен.. Ако се земе предвид дека голем дел од продадените државни парцели за изградба на хотели се наоѓаат на атрактивни локации, а се продадоа по багателна цена, која во некои случаи достигна само 20 илјади евра, логично е и прашањето ќе се изградат ли навистина сите тие хотели или по извесно време парцелите ќе се пренаменат за изградба на друг вид комерцијални објекти или пак, станбени. Сомневањата уште повеќе се подгреваат кога ќе се види дека повеќето од локациите се продадоа уште пред две години, а до денеска на ниту една од нив нема градежни активности. Ги нема барокните хотели на Кале. Ќе плаќаат ли пенали инвеститорите? Според деталниот урбанистички план „Парк 2“, под Кале требаше да се градат дури пет хотели. Три парцели се веќе продадени, а една од локациите, наспроти Градска плажа, купи Марјан Јованов, поранешниот директор на Дирекцијата за нафтени резерви. Според информациите од општина Центар, Јованов веќе има обезбедно градежна дозвола, иако не информираат дали почнал со изградба на хотелот. Фактор се обиде да стапи во контакт со него, но Јованов остана недостапен за информација. Лани тој изјави дека нема намера во јавност да изнесува детали за изградбата на хотелот и да се промовира себеси. На левиот брег на реката Вардар, спроти градскиот парк, освен хотелот на Јованов, предвидена е изградба на уште два хотели од страна на фирмата 3Д Тим Инвест ( во сопственост на Марјан Јованов) и на албанската компанија Амадеус Груп. Во општина Центар немаат информации ниту за динамиката на изградба на овие два хотели, но потврдуваат за добиени градежни дозволи, барем за еден од инвеститорите. „Фирмата 3Д Тим Инвест веќе има градежна дозвола, но Амадеус груп нема уште добиено. Тие доставија идејно архитектонско решение кое се уште се разгледува во општината, што значи се уште се во процедура“, кусо одговорија од општината. Но, процедурата е јасна за изградба на сите планирани хотели. Инвеститорите имаат обврска да ја обезбедат градежната дозвола во рок од 9 месеци по купувањето на земјиштето, а објектите да ги изградат во определен законски рок од шест години. Нема информација дали Амадеус груп ќе плаќа пенали за доцнењето иако компанијата која има отворено претставништво во Скопје, купи земјиште и во скопската општина Петровец за изградба на друг хотел. Локацијата се наоѓа во близина на аеродромот Александар Велики. И Охрид ги чека своите луксузни хотели Хотел од светски бренд, но во Охрид, треба да гради и туристичката агенција Фибула ер травел, која исто така, пред две години купи две атрактивни државни локации за само 20 илјади евра. Но, сопственикот Асим Меџедовиќ за Фактор вели дека се уште ја нема извадено градежната дозвола. „Земјиштето е чисто, но чекаме некои фирмално правни детали да се средат. Овој период го користевме да разговараме со неколку ланци светски хотели, бидејќи откога ќе го изградиме треба и да го брендираме. Бевме и на саеми во Истанбул, Холандија, Австрија, Хелсинки и веќе бараме потенцијални гости„ вели Меџедовиќ. Како инвеститор на луксузен хотел во Охрид се јавува и фирмата Дивелоп Груп која пред две години ја купи познатата локација Горица 3, која повеќе години не можеше да најде инвеститор. До денеска и на оваа локација нема градежни активности. Првиот Мериот во Скопје веќе се гради на плоштадот Македонија Иако првично беше најавено дека првиот светски хотелски бренд во Скопје ќе биде изграден до октомври годинава, најверојатно ќе има пролонгирање на инвестицијата. Фирмата Дивелоп груп која се јавува како инвеститор на Мериот, дел од светскиот синџир Мериот интернационал, веќе забрзано гради на плоштадот Македонија, но изградбата е се уште во почетна фаза. Во близина на мостот Близнак, покрај реката Вардар, хотел треба да гради и Ајдован Адемовски, инвеститорот на Стоун бриџ, а во општина Петровец, освен Амадеус груп,  парцела купи и наш повратник од Австралија со фирмата Лид градба, која плати 35.000 евра за земјиште за изградба на хотел кој ќе биде со висина од 25 метри, приземје и шест ката. Соња Наумовска