НЕМА НИКАКВИ ГАРАНЦИИ: На Вучиќ му нудат да го признае Косово, и ништо повеќе
Објавено во: Балкан 24 Октомври, 2019
Никој ништо не му нуди на Белград во врска со косовското прашање, освен да го признае Косово во рамките на границите признати од западните земји.
Ова го тврди српскиот претседател, Александар Вучиќ.
„Мислите дека некој друг ни понуди нешто друго, бидејќи слушам приказни за тоа како поделбата е предавство? Никој не ни нуди ништо друго освен да го признаеме независно Косово како целина во рамките на границите на независно Косово,“ изјави Вучиќ, јави МИА.
За информацијата дека специјалниот претставник на претседателот на САД за преговорите Белград-Приштина, Ричард Гренел, барал признавање, а за возврат понудил инвестиции, Вучиќ вели дека имал добар разговор со него и дека нема да одговори на претпоставките што се појавуваат во јавноста.
Српските медиуми пишуваат дека американскиот претседател, Доналд Трамп преку посредник порачал дека Србија мора да го признае Косово. САД бараат Србија да го признае Косово, а притисок се најавува и од Европската Унија.
Вучиќ деновиве во интервју за виенскиот весник Стандард рече дека можноста Белград да го признае Косово во актуелните граници е исклучена, па дури и воопшто дека некогаш ќе го признаат Косово. И ние ли ќе добиеме исти гаранции од ЕУ како С.Македонија ако го решиме косовското прашање, праша Вучиќ во интервјуто.
фото ЕПА