Неодржливи се високите цени на кафето: Експертите предвидуваат пад на потрошувачката и „рушење“ на цените

Добивај вести на Viber

Цената на кафето се зголемува низ целиот свет за крајните потрошувачи бидејќи неговото одгледување е тешко поради климатските промени, но и поради неповолните пазарни услови за малите одгледувачи, кои се основа на производството на ова растение.

Климатските промени влијаат врз приносите на кафе и растот на цените, што предизвикува загриженост кај потрошувачите и производителите.

Регенеративното земјоделство и техниките како што е компостирањето можат да помогнат во намалувањето на трошоците и подобрувањето на квалитетот, велат експертите.

Потрошувачите можат да помогнат со купување сертифицирани и одржливи сорти кафе и со поддршка на производителите кои се грижат за екологијата.

Андреа Или, претседател на италијанската компанија за преработка на кафе „Или“, рече дека сегашните високи цени на кафето се резултат на минатогодишните суши во Виетнам и Бразил предизвикани од „Ел Нињо“, океанска струја што се движи напред-назад низ јужниот дел на Тихиот Океан.

Климатските промени го зајакнаа влијанието на „Ел Нињо“ и го проширија, дури и до атлантските локации како што е Бразил. Ова доведе до поголеми суши, што ги намали приносите и ја зголеми цената на зеленото кафе за речиси 55 проценти.

„Дури и одгледувачите на кафе не се задоволни од толку високата цена, бидејќи велат дека е неодржлива. Потрошувачката ќе падне, а потоа цената ќе се сруши“, рече Или.

Одгледувачите во периоди на поголема побарувачка се обидуваат да го искористат моментот со садење повеќе дрвја, за зголемување на производството.

„Потоа, една година подоцна, пазарот е преплавен со кафе, а цените паѓаат како камен. Ова е типичен тренд. Продолжуваме да ги правиме истите грешки“, оцени Или.

Како што планетата продолжува да се затоплува, се проценува дека до 2050 година ќе има половина помалку земја погодна за одгледување кафе, а одгледувачите ќе мора да се преселат на поголеми надморски височини.

Во исто време, болести како што е 'рѓата на листовите од кафе, габа што го десеткува ова растение низ целиот свет, ќе продолжат да се шират.

Кафето го одгледуваат земјоделци во 70 земји низ Јужната хемисфера, а 95 проценти од 12,5 милиони фарми за кафе се помали од пет хектари.

Околу 60 проценти од светското кафе доаѓа од мали фарми, а само во Виетнам и Бразил, каде што поголемите фарми се почести, земјоделците заработуваат доволно за да се извлечат од сиромаштијата.