Несреќи со трактор во радовишко и светиниколско - двајца повредени

Добивај вести на Viber

Две сообраќајни несреќи со трактор се случија вчера во Македонија. 

Во незгодите со тешки телесни повреди се здобиле тракторист и сопатник. Една од несреќите се случила на регионалниот пат од село Војславци кон Радовиш, а другата на локалниот пат Свети Николе  – село Ѓуриште. 

На локалниот пат Свети Николе – село Ѓуриште на месноста викана Бареш, околу 8.25 часот  се случила сообраќајна незгода помеѓу трактор „Фиат 640“ управуван од Ѕ.Р.(47) од село Горобинци и автомобил „Фиат Пунто“ управувано од В.Н.(57) од Свети Николе. Тракторот се превртел на коловозот. Во незгодата со тешки телесни повреди се здобил сопатникот на тракторот  И.Т. (50)  од село Горобинци, кој со возило на Брзата помош е префрлен и задржан на лекување во Медицинскиот центар-Штип.

Сообраќајката на патот кон Радовиш се случила околу 11:40 часот кога пред објектот „Илинден 92“,  Ј.И.(59) од село Војславци возејќи трактор „ИМТ-533“, изгубил контрола и излетал надвор од патот при што удрил во ограда од бетонски столбови и челична мрежа, а потоа се превртел во нива. Со возило на Брзата помош тој  е пренесен во Медицинскиот центар-Штип, каде му е укажана лекарска помош и му се констатирани тешки телесни повреди, по што е задржан на понатамошно лекување.

Увид на местото на несреќите направиле екипи од полициските  станици Радовиш и Свети Николе.