НИКАДЕ БЕЗ СЕРТИФИКАТ: Грција, Словенија, Швајцарија ги заострија мерките
Објавено во: Свет, Корона Вирус 17 Септември, 2021
Европа се подготвува за нов бран, мерките се заоструваат, и речиси никаде не може да се влезе без ковид-сертификат.
Грција, Словенија, Швајцарија ги заострија рестрикциите. На 13 септември Грција воведе нови мерки против коронавирусот, кои ќе траат до 31 март следната година, и вклучува задолжително неделно тестирање на лицата кои не се вакцинирани, додека услов за пристап до одредени затворени простории се вакцинација или негативен тест за коронавирус.
Во Словенија, од среда вработените во јавните институции и компании, како и нивните клиенти, мора да имаат потврда за вакцинација, прележан ковид или негативен тест. Потребен е сертификат за влез во трговски центри и јавен превоз, освен за ученици од основно и средно училиште. Потребни се и сертификати во здравствени установи, освен во итни случаи.
Во Швајцарија, сертификат е потребен за влез во јавни институции, ресторани, фитнес-центри и други затворени простории.
Швајцарската влада донесе одлука, со цел да се спречи преоптоварување со здравствениот систем, обврската за поседување сертификат да се прошири и на дополнителен број институции. Така, се воведува обврска за потврда за вакцинација, прележан ковид или негативен тест, за сите лица над 16 години, во временски период до 24 јануари следната година.
Сертификатот ќе биде задолжителен за сите настани што се одржуваат во затворени простории и вклучува концерти, театри, кина, спортски натпревари, но и свадби.