Никола Димитров читал писма од Гоце Делчев пред денешните средби во Софија

Добивај вести на Viber

Министерот за надворешни работи Никола Димитров денеска во Софија во рамки на Црноморската иницијатива ќе се сретне во високи политички претставници на Бугарија за да го дефинира нивниот став кон Гоце Делчев како историска личност, но и да даде придонес во изнаоѓање на заеднички прифатливо решение. Синоќа во емисијата „Само Вистина“ откри дека изминатиот викенд читал оригинални писма од деецот, што најверојатно му послужиле како аргументи за подготовка пред денешното заминување во Бугарија.

Димитров веќе рече дека Македонија и Бугарија не треба да градат непријателства околу ликот и делото на Делчев, по замерките во политичките кругови кај источниот сосед дека Бугарија може да изгради негативно гледиште кон евроинтеграциите на Македонија доколку не се најде заеднички-прифатливо решение, иако веќе е потпишан договорот за добрососедство во 2017.

- Во времето на нашиот херој Гоце Делчев ние не сме имале држава и тој учествувал во еден огромен темел на нашата државност, во создавањето на политичката нација, што е многу блиску до создавањето на етничката идентификација. Изминатиот викенд најдов една архива и читав оригинални писма од Гоце Делчев што ги испраќал до Никола Малешевски и другите соборци. Тој бил неверојатен визионер и уште во тоа време во „Гоцевиот устав“ барал борба со т.н. Тиранија, а не со Османлиите. Неговото визионерство може да ни служи како мост со Бугарија, рече шефот на македонската дипломатија синоќа во телевизиското гостување.

Во меѓувреме продолжуваа преписките меѓу Македонија и Бугарија за Гоце Делчев, односно неговиот идентитет. Бугарскиот европратеник Ангел Џамбаски вели дека интеграцијата на Северна Македонија во НАТО и ЕУ ќе мине низ патот на признавање на вистинската историја.

За премиерот на Бугарија Бојко Борисов, Гоце Делчев е бугарски херој, кој се што имал жртвувал за слободна Македонија. Пред една недела и министерката за надворешни работи на Бугарија, Екатерина Захариева рече дека нема да прави компромис со вистината и дека од Северна Македонија не сака ништо повеќе освен вистината. 

Комисите составени од историчари допрва треба да одлучат како заеднички ќе се чествува Делчев и што ќе пишува за него во учебниците.