НОВ ММФ ИЗВЕШТАЈ: Потребна е храбра реформска агенда за намалување на страотната невработеност!

Добивај вести на Viber

Македонија оваа 2013 та година ќе прикаже економски раст, до година стапката ќе биде повисока. Меѓународниот Монетарен Фонд во својот октомвриски извештај насловен : „Транзиции и опасности“ ги објавува најновите прогнози и проекции за движењата на светските економии, меѓу нив и за Македонија. Според ММФ, оваа економска година ќе заврши со раст на БДП од 2,2%. До година, проекцијата изнесува 3,2% а дури во 2018 та се предвидува стапка на економски раст од 4%. Земјава, според прогнозите за економски раст е во друштво со Полска, Романија, Србија и Албанија. Од регионов, годинава според ММФ, најдобри економски показатели, односно раст на БДП од 2,6%, ќе испорача Косово. Според анализата на фондот, Косово догодина  ќе достигне повисок раст од 4 отсто, односно во 2018 та раст на БДП од 4,5%. Од земјите од Централна и Источна Европа, годинава само хрватската економија ќе биде во негативна зона со стапка од – 0,6%. До година, според стапката на економски раст, Македонија би била во подобра позиција од Албанија, Босна, Бугарија, Хрватска, додека би каскала зад Косово, Латвија, Литванија и Турција. До година, според очекувањата на ММФ и хрватската економија би излегла од рецесија. Според проекциите на ММФ, економскиот раст во земјите од Централна и Источна Европа годинава ќе изнесува 2,3% додека до година растот е проектиран на 2,7%. Храбра реформска агенда “Политиките треба да се фокусираат на подигнување на потенцијалот за раст, кој се проценува дека значително ќе се намали со оглед на глобалната финансиска криза. За многу земји каде што голем дел од високата стапка на невработеност се појавува како структурна,  ќе биде потребна храбра реформската агенда за да се ублажат тесните грла. “ – пишува во Извештајот на ММФ. Како можна опасност по економиите и натаму се посочуваат натамошните задолжувања и дефицити. “Во земјите со висок долг или дефицит во последните месеци се забележува повторување и зголемување на ризиците, за што ќе бидат потребни мерки за да се намали оваа ранливост“ – се посочува во Извештајот на ММФ. И до година, генератор на глобалниот економски раст би биле земјите од Азија. Така, според ММФ, растот на БДП во Кина ќе забави но нема да биде помал од 7,3%. За Индија се предвидува раст од 5,1%, повисока стапка во однос на годинашното очекување од 3,8% раст на БДП. Од земјите на Средниот Исток, Либија се очекува да испорача раст во 2014 та година од фантастични 25,5% за разлика од годинешната прогноза за рецесија од -5,1%. До година според ММФ, американската економија ќе испорача раст од 2,6%. Руската економија догодина се очекува да оствари стапка на економски рат од 3%. Д.А.