Добивај вести на Viber
Претседателот на Кина Ху Џијантао повика на основање на нов модел на стопански раст на земјата кој ќе се темели на поголема домашна побарувачка и на приватните компании, со цел за да се обезбеди подобра кондиција на економијата. Во говорот на отварањето на Конгресот на Комунистичката партија во време на бавниот стопански раст, Ху рече дека Кина мора да го промени економскиот модел кој се темели на извоз и инвестиции и кој се смета за неодржлив.
Сепак, во петокот Кина објави охрабрувачки податоци кои укажуваат дека растот на втората светска економија можеби закрепнува. Индустриското производство, прометот во малопродажбата и инвестициите во обврзници бележат поголем пораст во октомври од очекуваниот. Стапката на инфлацијата ослабна, спуштајќи се во претходниот месец на 1,7 отсто, што е нејзина најниска вредност од јануари 2012 година. Производството бележи пораст од 9,6 отсто, а прометот во малопродажбата 14,5 отсто, што укажува на стабилна домашна побарувачка.