Нова среќа за „Јужен тек“, ќе биде ли овојпат?

Добивај вести на Viber

Македонија се приклучува кон „Јужен тек“. Договорот треба да биде потпишан за два дена. Македонија ќе го стави својот потпис за Јужен тек, објави денеска премиерот Никола Груевски, кој заминува утре за Москва, каде што во вторник треба да биде потпишан договорот. Груевски денеска соопшти дека Руската федерација ја информирала Владата дека се завршени сите постапки од нивна страна кои се неопходни за склучување на договор. „Морам да кажам дека ова е исклучително значаен проект за нас затоа што со Јужен тек практично на долг рок се гарантира енергетската стабилност на Македонија. Се обезбедуваат нови количини на гас кои ќе направат и проектот за внатрешна инфраструктура за преносот на гас во Македонија да добие една поголема смисла бидејќи внатрешната инфраструктура за која исто така имаме зацртано план како да ја реализираме и планираме брзо да почнеме, зависи од тоа дали ќе имаме доволни количества гас,“ истакна Груевски. Тој додаде дека со склучувањето на договорот за Јужен тек сите други понатамошни операции за гасификација на Македонија, за градење на внатрешна инфраструктура на гасоводи добива смисла. Сепак, дополнително треба да се утврдува со кој крак Македонија ќе биде приклучена кон „Јужен тек“, дали преку Бугарија или Србија. Тоа, според Груевски, ќе биде одлука на „Гаспром“, а не наша. „Се обезбедуваат нови количини на гас кои ќе направат и проектот за внатрешна инфраструктура за преносот на гас во Македонија да добие една поголема смисла. Внатрешната инфраструктура за која исто така имаме зацртано план како да ја реализираме зависи од тоа дали ќе имаме доволни количини на гас“, рече Груевски. Ова е втор обид за ставање потпис за Јужен тек, после првиот, кога, иако беше најавено од Владата, на економскиот самит во Санкт Петербург на крајот на јуни, Македонија не го потпиша договор со Русија за вклучување кон овој гасоводен проект. Тогаш Владата информираше дека тоа ќе се случи наскоро.