Нова тура на вакцини за Македонци во Србија: по новинарите, на ред се бизнисмените
Објавено во: Економија 25 Март, 2021
Бизнисмени од регионот овој викенд ќе примат вакцина против ковид-19 во соседна Србија.
Ова е најавата која дојде од коморскиот инвестициски форум со акција за побрза имунизација на бизнисмените од Западен Балкан.
Како што соопшти првиот човек на Стопанската комора Бранко Азески, 10 000 вакцини се обезбедени за вакцинација на бизнисмени од регионот.
„Со оваа акција исто така се потврдува слоганот на Коморскиот инвестициски форум – Еден регион, една економија. Можеме да потврдиме дека во рамките на Стопанската комора на Северна Македонија во текот на денешниот ден се остварува интензивна активност да се направи најдобриот можен избор на лица од бизнисот чии работни места неопходно се врзани за патување, движење и контакт со многу луѓе, да на овој начин станат оперативно способни да можат да го задржат нивото на економска активност и да ѝ помогнат на државата во борбата против пандемијата“, посочува Азески.