КОМОРСКИОТ ИНВЕСТИЦИСКИ ФОРУМ ВО АКЦИЈА ЗА ПОБРЗА ИМУНИЗАЦИЈА НА БИЗНИСМЕНИТЕ ОД ЗАПАДЕН БАЛКАН
10.000 вакцини обезбедени во текот на викендот за бизнисмени од регионот
Објавено во: Економија 24 Март, 2021
Бранко Азески, ко-претседател на Коморскиот инвестициски форум
Во понеделникот оваа недела, во мојата редовна колумна објавена во Фактор, се обидов на може прецизен и јасен начин да ја појаснам улогата на Коморскиот инвестициски форум, како една од трите институции на подрачјето на Западен Балкан, која се обидува да ја подигне размената и да ги елиминира бариерите во економската соработка помеѓу Албанија, Босна и Херцеговина, Косово, Северна Македонија, Црна Гора и Србија.
Денеска тие интенции добија и конкретна потврда со заедничката акција на оваа институција за имунизација на бизнисмени од регионот, која е во интерес на одржување на бизнисите и работните места.
Оваа акција на Стопанската комора на Србија која заедно со Стопанската комора на Северна Македонија беше реализирана во рамките на Коморскиот инвестициски форум, се однесува на бизнисмените од 6-те земји на Западен Балкан. Ние во петокот разговараме за оваа тема на состанокот на Управниот одбор, која се одржа во Подгорица, но сме изненадени од брзината на позитивниот одговор на српската страна, што уште еднаш ја потврдува тезата дека бизнисот не признава граници и во секоја ситуација ја изразува својата кооперативност.
Со оваа акција исто така се потврдува слоганот на Коморскиот инвестициски форум – Еден регион, една економија. Можеме да потврдиме дека во рамките на Стопанската комора на Северна Македонија во текот на денешниот ден се остварува интензивна активност да се направи најдобриот можен избор на лица од бизнисот чии работни места неопходно се врзани за патување, движење и контакт со многу луѓе, да на овој начин станат оперативно способни да можат да го задржат нивото на економска активност и да ѝ помогнат на државата во борбата против пандемијата.
Коморскиот инвестициски форум и понатаму продолжува со активностите за поддршка на компаниите и бизнисмените од регионот на Западен Балкан.