Новата зграда на Министерството за финансии ќе чини 15, 5 милиони евра

Добивај вести на Viber

15,5 милиони евра ќе и плати Министерството за финансии на компанијата ЛСГ Билдинг Солушнс ДООЕЛ од Скопје. Разликата меѓу двете добиени понуди е околу 50.000 евра. Според објавата на Електронскиот систем за јавни набавки, Министерството за овие пари бара изведување на градежни, градежно занаетчиски и инсталатерски работи, како и внатрешно и надворешно уредување на новиот објект на Министерството, кој ќе биде лоциран на улица “Луј Пастер“ бб, во центарот на Скопје. Министерството за финансии ја склучи оваа зделка за доградба на поранешна Југобанка, објект кој се простира на површина од 14.000 метри квадратни, откако пред речиси една година Министерството го раскина договорот за градба со словенечката компанија Енергоплан. Според последните јавнодостапни информации, во новата административна 11-то катница покрај Министерството за финасии планирано е да се сместат и Бирото за јавни набавки, Државниот девизен инспекторат и Управата за имотно-правни работи. Услов за градежните компании да се јават на тендерот беше доказ дека фирмите до сега имаат изведено најмалку три објекти од високоградба во последните пет години, чијашто вкупна квадратура не е помала од 10.000 метри квадратни со вкупна вредност поголема од 10.000.000 евра. Од понудувачите се бараше и да имаат лиценца „А“ за изведување. “Компанијата треба да има високо стручен кадар кој ќе биде ангажиран за реализација на предметот на набавката и тоа за главен инженер за изведба - раководител на градба - архитект или градежен инженер со работно искуство над 10 години и овластување „А” издадено од Комората на овластени архитекти и инженери на Македонија, минимум двајца дипломирани инженери архитекти или дипломирани градежени инженери, најмалку по двајца дипломирани електро и машински инженери со овластување „А” издадено од Комората, како и најмалку пет дипломирани градежни инженери со овластување „А” издадено од Комората на овластени архитекти и инженери. Главниот инженер за изведба - раководител на градба да бил главен инженер на градба на минимум три изведени објекти/градби од високо градба во последните пет години во земјата или странство, а чијашто површина кумулативно не е помала од 5.000 метри квадратни“, пишуваше во огласот од Министесрството. Од потенцијалниот инвеститор се бараше да располага и со своја опрема и механизација. Познавачите коментираат дека строгите “правила на игра“ ја стеснуваат конкуренцијата и можноста за намалување на цената.