Нови непредвидени 75.650 евра за обиколницата околу Градскиот стадион

Добивај вести на Viber

За само 15 дена градежната фирма Гранит ќе “лапне“ 75.650 евра за непредвидени активности за изведбата на обиколницата околу Арената Филип Втори. Парите треба да ги исплати Општина Центар која за овие активности со Гранит се догововорила “во четири очи“, без претходно да распише тендер. “Таквите дополнителни работи или услуги не можат да бидат технички или економски одделени од основниот договор без поголеми проблеми за договорниот орган“, е образложеннието на Општина Центар, според објавата на Бирото за јавни набавки. Во март минатата година Општина Центар започна со изградба и реконструкција на обиколните улици кај Национална Арена Филип II Македонски. Инвестицијата тогаш беше проценета на околу 570.000 евра (35 милиони денари), а која опфаќа изградба на атмосферска мрежа со должина од 550 метри квадратни, коловози со вкупна површина од 14.310 метри квадратни, тротоари со површина од 5.832 метри квадратни, како и комплетно осветлување по целата должина на обиколните улици. Обиколницата ја изведува градежната компанија Гранит. Во рамки на вкупната инвестиција со по една третина учествуваат Градот Скопје, АД за изградба и стопанисување со станбен и деловен простор од значење за Републиката и Општината Центар.