Нови 70 скулптури и во Градскиот парк

Добивај вести на Viber

Скопскиот Градски парк во следните две години ќе се збогати со нови 70 скулптури, светлечки фонтани и други реквизити. Ваквите новитети, се предвидени со Програмата за партерно уредување и поставување на скулптури и урбана опрема во централниот дел на Градскиот парк, а за која следниот понеделник треба да гласаат и градските советници. Со Програмата е предвидено изградба на “Паркот на цивилизациите”, кој најверојатно ќе биде сместен позади ресторанот “Уранија”, а  каде што странските амбасадори ќе можат да донираат скулптури, нови влезни порти, игралишта за деца со композиции од едукативен и интерактивен карактер, локации за поставување на единечни скулптури, фонтани во облик на скулптура, фонтани со светлечки ефекти и млазови, најразлични чешми, летниковци, нови пешачки патеки, јавни тоалети и поставување на нова  водоводна, фекална, атмосферска и електрична мрежа. Новите содржини е планирано да се постават во централниот дел на паркот, односно делот од паркот во рамки на општина Центар ограничен со булевар “Илинден” заедно со новата улица Наум Наумовски-Борче и границата со општина Карпош. Како што стои во образложението од  Град Скопје, ваквото уредување на Градскиот парк, е од големо значење за сите жители на Скопје и неговото постојано унапредување и содржинско збогатување е со цел да што повеќе од жителите своето време да го поминуваат во паркот. Неговото унапредување е важно и од аспект на збогатувањето на зелените површни кои несоменоно треба да замемаат се поголем дел од урбаниот концепт на градот Скопје, се вели во образложението. Од Градот објаснуваат дека активностите кои се однесуваат на партерното уредување на  Градскиот парк, како и поставувањето на скулптурите и урбаната опрема, ќе се реализираат преку изработка на Архитектонско-урбанистички проект за Паркот и изготвување Основни проекти за реализација на Архитектонско-урбанистички проект, во согласност со законот. Засега не е познато колку точно пари ќе се потрошат за разубавувањетѕо на Градскиот парк, единстевно во образложенитео од Градот стои дека финансирањето на програмата ќе се изврши со средства кои ќе бидат обезбедени од буџетот на Град Скопје во текот на 2013 и 2014 година.