Новинарка сведочеше за претепувањето на Села - го нападнале најмалку шест луѓе

Добивај вести на Viber

Една од новинарките кои на 27 април  на „крвавиот четврток“ беа во Собранието, денеска во судница ги препознаа лицата кои го тепале претседателот на Алијансата на Албанците, Зијадин Села. Таа раскажа што се случувало во Собранието на 27 април. 

„Бевме во прес центарот, каде Зоран Заев и Џафери требаше да имаат заедничка изјава. По изјавата во салата беа вклучени двата телевизора, на едниот од нив Тв Нова прикажуваше со дрон што се случува пред Собранието и така видовме дека луѓето влегуваат. Пратениците застанаа во десниот ќош, а новинарите во левиот”- кажа новинарката. 

Таа раскажа како беше претепан Села. 

,,Го маваа најмалку шест луѓе со се’ што ќе стигнеа. Тој се’ уште беше во стоечка положба, но се клатеше. Потоа падна на колена и мислам дека тоа им беше поттик да продолжат да го удираат. За кратко тој веќе беше паднат на земја со главата на подот. Тој не оддаваше знаци на живот, не се бореше”- раскажа новинарката.

Додека се слушале извици ‘Го убивте!’ еден од напаѓачите го фатил Села за косата. 

„Некој извика ‘Носете го!’ по што почнаа да го влечат“ – додаде новинарката. 

Таа денеска во судница препозна дел од лицата, но другите не можеше да ги препознае бидејќи имале маски на главите и се сеќаваше само на нивната гардероба. На барање на обвинителот, Судот дозволи таа да го погледне фото албумот кој е материјален доказ во постапката, по што таа препозна уште неколку лица. Одбраната пак, реагираше на ова бидејќи доказот се уште не е изведен.

Новинарката објасни дека откако излегла од прес центарот, новинарите биле евакуирани во канцеларијата на пратеникот од ВМРО ДПМНЕ, Влатко Ѓорчев кој информирал дека Села е во критична состојба.