Новиот Клинички центар ќе чини 500 милиони евра, ќе биде готов за седум години

Добивај вести на Viber

Кредит од 500 милиони евра од комерцијални банки ќе позајми државата за да го изгради новиот Клинички центар во Ѓорче Петров во Скопје. Со овие пари ќе се покрие проектирањето, изведбата, обуката на лекарите и медицинскиот персонал кој ќе работи во државните клиники. Министерот за здравство Венко Филиче денеска изјави дека процесот на позајмувањето го води Министерството за финансии, но средствата ќе бидат од банкарски конзорциум од три банки, Рајфајзен, Уникредит и Ерсте банка. Се очекуваат поволни кредитни услови.

Според првичните проценки градежните активности треба да почнат веќе до крајот на оваа година, а првата фаза од изградбата ќе биде за три ипол години, кога ќе биде практично прегледан и првиот пациент. По етапи прво ќе се отворат хируршките клиники и интензивната нега. Целиот проект е планирано да биде завршен за 7 години кога се очекува изградбата целосно да заврши.

„Оваа есен би требало парцелата каде што треба да се гради новиот клинички центар да се обезбеди со патна инфраструктура, со водовод, канализација и гасоводна мрежа. Парцелата од 30 хектари на која треба да се гради Клиничкиот центар е во државна сопственост. Планирано е центарот да се простира на 105.000 квадратни метри“, истакна Филипче.

Здравствените власти сметаат дека со овој проект граѓаните ќе добијат современ европски клинички центар кој ќе биде во функција во наредните 6-7 децении.

Исто така, Филипче потенцира дека сегашниот клинички центар Мајка Тереза, има опција да остане во функиција и во иднина, за потребите на граѓаните коишто живеат во близина.