Новите патнички возови ќе се набавуваат од Кина

Добивај вести на Viber

Од кинеската корпорација CSR ќе се набавуваат четири дизел моторни гарнитури и две електромоторни гарнитури за превоз на патници во железничкиот сообраќај. Македонските власти денеска го потпишаа договорот со кинеската компанија, кој треба конечно да го модернизира патничкиот железнички сообраќај во земјата. Гарнитурите со капацитет од 1.200 патници треба да стигнат следното лето. Целосно ќе бидат климатизирани, опремени со вакуум тоалети, енергетски ефикасни и ќе ги задоволуваат сите безбедносни стандарди, како и стандардите за превоз на лица со ограничена мобилност. Во трка за да ја снабди Македонија со нови возови беше и швајцарската компанија Штадлер Буснанг АГ, но швајцарската понуда беше поскапа за околу половина милион евра. Набавката на овие возови е само прв циклус од планираните инвестиции во железницата. „Владата планира голем инвестициски циклус во Македонската железница со изградбата на пругата кон Бугарија, реконструкцијата на железницата во Скопје како и набавката на нови вагони. Во следните четири години планирани се инвестиции од 250 милиони евра за трансформација и реорганизација на македонскиот железнички сообраќај. За набавка на нови патнички вагони предвидени се 25 милиони евра, за товарни вагони 15 милиони евра и 10 милиони евра се за рехабилитација на веќе постоечки возови“, вели вицепремиерот и министер за финансии Зоран Ставрески. „Започнуваме со креирање на нова слика за железничкиот транспорт во Македонија. Ќе направиме модернизација на железничката инфраструктура со квалитетен, ефикасен и ефективен превоз со модерни возови.Ова е долг и очекуван процес, бидејќи последниот воз бил набавен пред 35 години“, додава министерот за транспорт и врски Миле Јанакиески. Кинеската компанија ветува дека навреме и во целост ќе го исполни договорот. „Досега нашата компанија има снабдено производи и сервиси за над 80 земји во светот. Во Македонија потпишуваме прв договор и мислам дека е многу важна иницијативата на македонската Влада да го подобри јавниот транспорт. Ветувам дека ќе ја оправдаме довербата и ќе понудиме супериорен квалитет“, вели претседателот на CSR корпорацијата Шу Цонгшијанг. Лани оваа компанија оставрила приход од 16 милијарди американски долари, а има склучено договори со клиенти во вредност од две милијарди долари.