Новогодишното украсување на Скопје ќе чини речиси 170 илјади евра

Добивај вести на Viber

Градот Скопје ги започна активностите за новогодишно украсување и декорирање по повод новогодишните и божиќните празници. Ќе се украсува дел од плоштадот „Македонија“ каде што не се изведуваат градежни активности, плоштадот „Пела“ и плоштадот „Филип Втори“, а украсувањето ќе чини 169 илјади евра. Освен ова, во поширокиот реон на централното градско јадро ќе бидат украсени и булеварот „Илинден“ до раскрсницата со улицата „Френклин Рузвелт“; просторот пред Владата, улицата „Даме Груев“, булеварот „Партизански одреди“ до раскрсницата со булевар „8 Септември“ и платото пред Универзална сала; улиците „Димитрие Чуповски“, „11 Октомври“, „ВМРО“, „Филип Втори Македонски“, потегот од раскрсницата кај Специјалнатa болница за хируршки болести „Св. Наум Охридски“ до раскрсницата кај Т.Ц. „Мавровка“, просторот пред Судската палата и булеварот „Гоце Делчев“ од Т.Ц. „Мавровка“ до Владата. Украсени ќе бидат и Старата чаршија пред националната галерија „Чифте амам“; паркот „Жена борец“, просторот пред црквата „Св. Богородица“; улицата „Македонија“ и булеварот „Климент Охридски“ од Владата до зградата на „Нова Македонија“. Традиционално ќе биде поставена централна новогодишна елка, висока 18 метри, со светлосни и други украсни елементи. Новогодишните декорации ќе ги постават фирмите „Линк Медиа” од Скопје и „Лутарико Дооел-Скопје”. Дополнително, посебни буџети за украсување предвидуваат и скопските општини, кои ќе ги декорираат сообраќајниците низ главниот град.