Новото „фиќо“ не се продава – проблеми за фабриката на Фиат во Крагуевац

Добивај вести на Viber

Компанијата „Фиат автомобили Србија“ привремено го прекинас производството во фабриката во Крагуевац. Овој месец нема да се работи најмалку пет дена, а работниците ќе останат дома и неколку дена следниот месец. Ова предизвика гласини дека би можело да станува збор за почеток на крајот на заедничката компанија на српската држава и италијанскиот производител на автомобили, формирана во 2008 година. „Причините за привремениот застој се од екстерен карактер и се однесуваат на случувањата на европскиот и светскиот автомобилски пазар, кои се условени од економски параметри и од самата економска криза. Во современото работење, привремено, краткотрајно запирање на производството е еден од вообичаените методи кои успешно се применуваат во ваква ситуација и овозможуваат компанијата набрзо да продолжи со работа“, појаснуваат со официјално соопштение од Фиат. Во соопштението не се наведува колку точно дена ќе трае прекинот во работата овој и следниот месец. Но, информацијата сепак предизвика загриженост во Крагуевац каде во фабриката на Фиат работат околу 3.000 работници и тоа е еден од ретките индустриски капацитети во овој град кој се уште функционира. Затворањето на фабриката би предизвикало проблеми не само за Крагуевац, туку за целата српска економија, во која „Фиат“ е важен инвеститор. Најголемиот извозник од Србија минатата година извезе автомобили во вредност од околу 1,5 милијарди евра, а во првите седум месеци од годинава извозот го зголеми за 10% во однос на истиот период лани. Синдикатот во Фиат автомобили Србија не добилпрецизни информации за причините за прекинот во работата, но се претпоставува дека до запирање на производството дошло заради намален интерес на купувачите за моделот 500-Л (новото „Фиќо“), чие сериско производство започна во 2012 година. Во фабриката во Крагуевац досега неколкупати било прекинато производството, но тоа речиси секогаш било резултат на доцнење на испораката на автомобилски делови од Италија. Договорот на српската држава со Фиат истекува на 31 декември 2018 година, и по овој датум секоја од двете страни може да го понуди својот удел на продажба - српската Влада поседува 33%, а Фиат 67% во компанијата. Вредноста на фабриката во Крагуевац се проценува на околу 1,3 милијарди евра.