Нури Бајрами од „Антикорупциска“: Поднесуваме иницијативи за разрешување на директори, не се прифаќаат сите

Добивај вести на Viber

Нури Бајрами, членот на Државната комисија за спречување на корупција, вели дека има случаи кога и покрај иницијативите на Антикорупциска ретко кој директор е разрешен.

– Неретко упатуваме иницијативи за разрешување директори или лица што од Владата се  назначени на функции. Такви три иницијативи за утврдено непрописно работење поднесовме до Централниот регистар и тоа до Управниот одбор. Токму тие тела најчесто или одговараат дека нашите наводи не се точни или, пак, не одговараат во рокот од 60 дена, а нема предвидено што понатаму во ваков случај – вели Бајрами за Слободен печат.

Не било издејствувано ниту барањето на ДКСК за Закон за висока раководна служба, со кој би имало конкретни критериуми за именување на членови на надзорните и управните одбори. Ниту Владата им ги прифатила иницијативите за разрешување на дел од директорите.

– Таков беше примерот со директорот на Агенцијата за филм. Ние баравме да се разреши веднаш, но тие решија да го разрешат многу подоцна и тоа не поради причините што ние ги наведовме. Директорите што се спорни ги менуваат единствено за време на реконструкција на Владата, а не ексклузивно по нашите иницијативи во кои укажуваме на неправилности во работата – додава Бајрами.

Во годинашниот извештај на „Транспаренси интернешенл“ Македонија се најде на 111. место, што е историски пад во однос на претходните години.

Од шеесет поднесени иницијативи на новиот состав на ДКСК, постапено е само по 17, а отфрлени се дури 15.