Обама и Путин разговараа за Украина

Добивај вести на Viber

Претседателот на САД Барак Обама разговарал денеска со претседателот на Русија Владимир Путин за ескалацијата на судирите во источниот дел од Украина и за „поддршката која Русија таму им ја пружа на сепаратистите“, соопштуваат од Белата куќа.

Во текот на телефонскиот разговор, Обама ја повторил поддршката на САД за украинскиот „суверенитет и територијален интегритет“ изјавил претставник од Советот за национална безбедност, пренесува АФП.

Обама истакнал дека бројот на жртви во судирите во Украина расте и нагласил дека е важно претседателот Путин да ја искористи шансата во разговорите во кои учествуваа Русија, Франција, Германија и Украина да постигне мирно решение.

Претседателот на САД рекол дека доколку Русија го продолжи агресивното дејство во Украина, ќе вклучи праќање на војници, оружје и финасирање на сепаратистите, цената која Русија ќе ја плати ќе порасне, се наведува во соопштението на Белата куќа.

Белата куќа претходно денеска соопштила дека украинскиот претседател Петро Порошенко го информирал Обама за новата рунда мировни разговори насочени на обезбедување на прекин на огнот на истокот од Украина.

Обама и Порошенко разговарале телефонски во моментот кога Обама го разгледува праќањето на убиствена воена помош на украинската војска.

Белата куќа не наведува дали во разговорот станало збор за праќање на воена помош на Украина.