Обвинителство: Истрагата продолжува, но сметките на „Актор“ се деблокирани

Добивај вести на Viber

Сметките на грчката градежна компанија „Актор“ во Македонија се деблокирани, потврдуваат за „Фактор“ од Државното јавно обвинителство. Во обвинителството велат дека истрагата против оваа компанија и натаму трае, но сметките биле одблокирани за таа да може да работи на автопатот Демир Капија - Смоквица. „Има повеќе различни дејства за проверка, а дел од нив и не се во надлежност на Обвинителството. Затоа и не може да се каже колку ќе трае истрагата“, велат од Државното јавно обвинителство. Истрагата против грчката компанија беше отворена по наводите дека пари се одлевале од сметките на „Актор“ на приватни сметки. Случајот го обелодени опозицискиот СДСМ, но институциите тврдат дека за него знаеле од порано и дека истрагата и претходно била во тек. Вчера компанијата информираше дека ја продолжува изградбата на делницата Демир Капија - Смоквица и оти веќе спроведува интервјуа за нови вработувања во нивниот камп во Миравци. Две сметки на „Актор“ беа блокирани од средината на минатиот месец, кога Обвинителството покрена преткривична постапка за оваа фирма. Тоа повлече и стопирање на работите на автопатот, бидејќи грчката компанија не можеше да ги исплаќа работниците. Б.А.