ОЧИТЕ НА СВЕТОТ ВПЕРЕНИ ВО БЕЛГРАД, СТУДЕНТИТЕ ОД ЦЕЛА СРБИЈА СЕ ТАМУ: Денеска е најмасовниот протест од кој стравува Вучиќ

Добивај вести на Viber

Белградските студенти, кои денеска организираат голем протест пред Собранието на Србија, на својата официјална страница на Инстаграм објавија дека собирот ќе започне во 16 часот.

Студенти од белградските факултети и граѓани синоќа се собраа во центарот на Белград на Теразие, каде организираа спектакуларен пречек на студентите кои пристигнаа во главниот град на Србија во пресрет на масовниот протест.

Некои групи студенти пешачеа повеќе од пет дена за да се приклучат на големиот протест наречен „15 од 15“ закажан за попладнево во 16 часот.

Револтот кој трае од почетокот на ноември минатата година по падот на настрешницата на железничката станица во Нови Сад, денеска најмасовно ќе го изразат студентите, земјоделците и граѓаните. Ова, како што велат студентите ќе биде најголем собир во серијата демонстрации по загинувањето на 15 луѓе во несреќата во Нови Сад.

Српскиот претседател Александар Вучиќ претходно и се обрати на јавноста и рече дека опозицијата и демонстрантите разговараат за плановите за предизвикување граѓанска војна и преземање на власта во Србија.

По 15 март планиран е тридневен генерален штрајк од 17 до 19 март, организирање акции за вклучување на што поголем број работници и радикализација на протестите и блокади на клучните економски сектори.

Клучни точки на блокадата за време на штрајкот ќе бидат Електростопанството на Србија (ЕПС), Градскиот транспорт (ГСП) и Колубара.

- Овој протест е повеќе од еден ден - тоа е повик за долгорочна борба за системски промени. Поддршката на што поголем број граѓани и работници е клучна за успехот, велат тие.