Од 1 јуни градежни дозволи ќе се издаваат електронски за 15 дена

Добивај вести на Viber

Дозволите за градење од 1 јуни ќе се издаваат по електронски пат. Новиот софтвер што за таа намена го изготви ЗЕЛС во соработка со Агенцијата за електронски комуникации, ќе овозможи дозвола за градба наместо за 45 дена да се добие за 15 дена доколку предметот е со комплетна документација.

Според министерот за транспорт и врски Миле Јанакиески  новиот систем ќе биде во интерес на граѓаните, но и поттик за странските инвеститори. „Преку електронскиот систем ќе се врши прием на барањата за издавање одобрение за градење директно во дигитална форма. Целиот процес ќе опфаќа само четири чекори од доставувањето на барањето до издавањето на одобрението за градење“ истакна јанакиески на промоцијата на новиот систем.

До 1 јуни ЗЕЛС на средби со граѓани и приватниот сектор ќе го презентира системот со цел прифаќање на евентуалните забелешки, а паралелно ќе се вршат обуки на администрацијата.

„При изработката на новата електронска алатка за одобренијата за градење се користени искуствата на Сингапур, а Македонија е единствена држава во регионот што ќе воведе таков систем“, информира Јанакиески.

Целосното воспоставување на електронското издавање на дозволите за градба чини 200.000 евра.