Од Радовиш до Струмица ќе се вози со 100 киломери на час, магистралата готова во јануари

Добивај вести на Viber

За 2 месеци, на местото на коцката, модерна магистрала треба да ги поврзе Радовиш и Струмица.  Патниот правец е во должина од 10 километри на кој е предвидено брзина на движење од 100 километри, наместо досегашните 40 километри на час. „Агенцијата за државни патишта и изведувачот „Гранит“ и во наредните неколку недели ќе продолжат со интензивно темпо на изградба и на почетокот на следната година ќе се заврши овој патен правец. Калдрмата ќе биде минато, а овој модерен пат ќе биде иднината која ќе помогне за граѓаните од овој регион да се возат безбедно и да имаат полесен пристап до Штип, па и до Скопје“, изјави вицепремиерот Зоран Ставрески, кој денеска беше во најавена посета на градежниците што работат на патот. Посетат ја искористи и за да најави дека во наредните четири години во патната и во железничката инфраструктура ќе се реализираат крупни проекти како што е проектот за проширување на патниот правец Велес - Кадрифаково. Потоа, посочи тој, во наредните четири години ќе се работи на автопатот Демир Капија - Смоквица како еден од најголемите проекти, а Владата бара пари и за реализација на автопатите кои беа најавени од Кичево до Охрид и од Миладиновци до Штип. Патниот правец Радовиш чини 445 милиони денари, средства обезбедени од Буџетот на Република. Со рокот веќе се доцни, бидејќи работата прво ја имаше добиено хрватската групација ИНГРА во време кога компанијата се соочуваше со големи финансиски проблеми. Владата во средината на јуни, токму поради доцнење со роковите, го раскина договорот со Хрватите, ја наплати банкарската гаранција и градежните работи на делницата ја зема „Гранит“. Како што веќе објави Фактор, моментално се асфалтираат последните десет километри од патот кај селата Сурдулци и Радичево. Патот Струмица–Радовиш е дел од магистралата Струмица-Штип, која почна да се гради пред дваесет години. Во изминативе две децении се изградија неколку делници, но целиот пат не беше довршен.