Од СЈО велат дека Јанева не би можела да „брише“ податоци

Добивај вести на Viber

Бришење на податоците, отстранување на материјатлите, во компјутерите на СЈО се врши етапно и само од персоналните компјутери на стручните соработници и истражителите, но не и на обвинителите, велат соговорници од таму за Дојче Веле и според тоа не би можело да има злоупотреба со бришење на податоци.

Ваквите коментари на обвинителите од СЈО следувале по медиумски пласираните информации дека специјалната обвинителка Катица Јанева дала усна наредба за „форензичко бришење на податоците“ од компјутерите во СЈО, постапка која наводно би била поврзана со случајот „Рекет“. Обвинителите велат дека таа постапка не може да се поврзе со оваа истрага.

„Стручните соработници и истражителите ги анализираат аудио материјалите, ги одвојуваат приватните од службените разговори, и сите податоци поврзани со тие материјали ги внесуваат во ексел-табела (времетрање на разговори, соговорници, клучни зборови според кои материјалот повторно може да биде пребаруван итн). Исто така, тие одвојуваат и транскрибираат материјал кој може да укажува на кривично дело и за тоа доставуваат извештај до обвинителот. Кога нивната работа на одреден аудио - материјал целосно ќе заврши и извештајот ќе биде доставен, од безбедносни причини повеќе нема потреба тој материјал и натаму да биде во персоналните компјутери на истражителите и стручните соработници, па информатичарите го ‘катираат‘ и го враќаат во базата“, велат соговорниците на ДВ.