Одбиено зголемувањето на европскиот буџет

Добивај вести на Viber

Државите членки на Европската унија го отфрлија предлогот на Европската комисија за зголемување на буџетот на Унијата за оваа година, објави шефот на делегацијата на Европскиот парламент Ален Ламасур за време на преговорите, а пренесува ИТАР-ТАСС. Преговорите меѓу претставниците на 27-те земји членки на ЕУ и на европските институции, синоќа во Брисел, не доведоа до компромис по ова прашање. „Земјите од ЕУ одбија да обезбедат дополнителни средства во буџетот на Унијата“, изјави Ламасур. Главниот проблем беше околу побарувањата на дополнителните 8,9 милијарди евра во форма на дополнителни придонеси во буџетот на ЕУ за 2012 година. Земјите членки го отфрлија категорично ова барање со оправдување дека Брисел „треба да си ги протегне нозете онолку колку што му е долга чергата“, посебно во период на криза, кога од сите држави се бара буџетска дисциплина. Заедно против зголемувањето на идниот буџет беа Германија, Франција, Велика Британија, Австрија, Холандија, Финска, Данска и Шведска. Поради оваа причина преговорите за буџетот на ЕУ за 2013 година, кој според пресметките на ЕК треба да достигне 138 милијарди евра, или со 6,8% повеќе од буџетот за 2012 година, воопшто и не започнаа. Сличен обид ќе биде направен на седницата на советот на министрите за финансии на земјите-членки на еврозоната во текот на следната недела, но поверојатно е дека разликите нема да се надминат и прашањето ќе остане отворено за лидерите на земјите од ЕУ кои ќе се состанат на 22 и 23 ноември. Ако не биде постигнат компромис, ЕК ќе мора итно да прави намалувања во предлог-буџетот на ЕУ за 2013 година.