Одлуката што ги скапа македонските производи: Има ли решение за проблемот со косовските царини
Објавено во: Економија 24 Јули, 2018
Не секој ден, туку со секој изминат час се зголемува штетата која косовските царини ја прават на домашното производство. Извозот е минимизиран, производите стојат во магацините или завршуваат на пазарите по багателни цени. Според податоците од Царинската управа за викендот извезен е само еден камион, а во понеделникот кон Косово поминале вкупно 4 камиони со околу 60 тони земјоделски производи. Пред зголемувањето на царините на одредени овошки и зелечнук се извезувале по четири шлепери дневно.
„Ако не се реши проблемот што поскоро, ние ќе претрпиме огромни штети. Најмногу на удар се доматите, пиперките и сливите. На кванташки ги дадовме производите по бадијала цена, 4 денари за килограм краставица, 6 денари за доматот, еден денар за лубеницата“, изреволтирано вели Стевче К.
Решение да се најде побараа и стопанските комори. Од Стопанската комора велат дека ЦЕФТА треба што поскоро да го реши проблемот, без да се одолговлекува.
„Се работи за лесно расиплива роба и секој ден одлагање значи голема штета на извозниците на земјоделски производи кои имаат веќе склучени договори со своите партнери“, информираа од Стопанската Комора на Македонија.
Владата да најде решение а не да чека е пораката и од Северозападната комора на Македонија.
Конкретно решение засега никој не понуди. Надлежните не планираат барем засега да воведат контра мерки, туку ќе почекаат од Косово да ја повлече одлуката а Министерството за земјоделство соопшти дека преговорите со Косово се во тек.
„Владата прави се за да не дојде во ситуација да воведуваме контра – мерки како одговор на постапката на Косово. Очекуваме, Владата на Косово да ја повлече донесената мерка со што ќе го надминеме спорот“, соопштија од МЗШВ.
Ресорните министерства на земјите од регионот кои покрај Македонија се најдоа на мета на косовски царини ќе го кажат ставот во среда, додека во петок на средби во Косово ќе одат министрите Бектеши и Николовски.
Македонија од Косово не увезува земјоделски производи, а кон Косово во првите шест месеци од 2018та земјава има извезено производи во сума од 2,5 милијарди денари.
Ирена Ставрова
Можеби ќе ве интересира
ИЗМАЧУВАЧКО БАВНО ЗАКРЕПНУВАЊЕ: Европската комисија ја намали економската прогноза за Германија
Меѓународните туристи добиваат подобро искуство за патување со преференцијалните мерки на Кина
ФАКТОР АНАЛИЗА: Најголеми компании по добивка во Струмица - Панче Заев и Г'на дебитанти
ЗА ДОБРА ГОЛТКА ВИНО СТРАНЦИТЕ НЕ ЖАЛАТ ПАРИ, „ТИКВЕШ“ СО ПРИХОД ОД НАД СЕДУМ МИЛИОНИ ЕВРА - еве колку е чистиот профит за три месеци
ФАКТОР АНАЛИЗА: Скопските ИТ компании доминираат со направените добивки кај програмерите
СЕ БЛИЖАТ ОДМОРИТЕ: Уживањето на плажа се плаќа на рати
АЗЕСКИ НА СРЕДБА СО РАКОВОДСТВОТО НА „КОСТАЛ ГРУПАЦИЈАТА“ ОД ГЕРМАНИЈА
Над 130 македонски компании на прва средба со Лидл за можна соработка
„ЗА МАКЕДОНИЈА НАЈДОБРО Е ДА ГО ПРЕЗЕМЕ ГЕРМАНСКИОТ СЛУЧАЈ“: искрено и во негов стил, Бранко Азески во „Бизнис Муабети“ на Фактор
