ОЕЦД: До 2016-та Кина ќе ја претрка САД, Индија е веднаш до неа

Добивај вести на Viber

Рамнотежата на економските сили се очекува драматично да се менува во следните 50 години, a уделот на новите, брзорастечки економии постојано ќе се зголемува, се вели во извештајот на Организацијата за економска соработка и развој (ОЕЦД). Различни долгорочни модели на раст ќе доведат до радикални промени во односот на економиите. САД ќе го отстапат првото место како најголема светска економија на Кина и тоа најверојатно околу 2016-та година. БДП-то на Индија исто така се очекува на подолгорочен план да го надмине американското производство. Двете азиски гиганти се очекува да ги надминат со својот БДП сите земји од групата Г-7 заедно. Земјите  кај кои што населението побрзо старее како Јапонија и еврозоната постепено ќе отстапат пред „помладите“ земји, како Индонезија и Бразил. Извештајот насловен „Поглед кон 2060 година: Глобална визија за долгорочен раст“ користи модел за предвидување на раст на 34-те земји - членки на ОЕЦД, и осумте големи економии во Г-20, кои не се членки на организацијата. Според истражувањето просечниот годишен раст на светскиот БДП ќе биде 3%,  но и ќе има големи разлики меѓу новите економии кои ќе растат со многу побрзо темпо и напредните земји, кои најверојатно ќе растат многу побавно, а понекогаш ќе бележат и пад. Растот во земјите надвор од ОЕЦД ќе остане повисок од просекот во ОЕЦД, иако разликата ќе намалува со годините. Од над 7% проценти во изминатата деценија, просечниот раст надвор од ОЕЦД ќе се намали на околу 5% во 2020, а до 2050 година ќе достигне околу 2,5 проценти. До 2020 година Кина ќе има најголем раст, но подоцна таа ќе биде помината од Индија и Индонезија. Во рамките на ОЕЦД растот ќе биде околу 2 отсто до 2060 година, како во многу земји во кои што има пад на економскиот раст. Различното ниво на БДП по глава на жител ќе ги одрази разликите во технологијата, капиталот, човечките ресурси и вештините на населението. Според Извештајот, трендовите за глобалниот БДП ќе бидат поставени пред се од стареењето на населението, кое ќе врши притисок врз продуктивноста, која е различна во многу земји. Намалувањето на наталитетот, како и долговечноста имаат негативен ефект врз растот, бидејќи водат до намалување на работоспособното население. Владите би можеле да одговорат на овој предизвик со зголемување на возраста за пензионирање. Прогнозите на ОЕЦД покажуваат дека стареењето ќе биде особено брзо во следните 50 години во Азија, Источна Европа и Јужна Европа.  Во овој период населението на планетата се очекува да се зголемува со 0.3% годишно и тоа зголемување ќе делува како пречка за растот на БДП по глава на жител.