Огласот за гасификацијата е поништен оти едната понуда е прескапа, а другата без банкарска гаранција!

Добивај вести на Viber

Министерството за траснпорт и врски информира дека огласот со кој се бараше изработка на физибилити студија за развој на гасоводните мрежи низ Македонија е поништен откако и двете понуди не ги задоволиле критериумите. „Ве информираме дека согласно рокот за доставување понуди по објавениот оглас за  изработка на физибилити студија за развој на дистрибутивни мрежи на природен гас во Република Македонија, беа доставени вкупно две понуди“, се вели во одговорот на Министерството. „Првата понуда е отфрлена од страна на комисијата која ја спроведува јавната набавка од причини што економскиот оператор не доставил банкарска гаранција на понудата во оригинал, а втората понуда е отфрлена од страна на комисијата која ја спроведува јавната набавка од причина што истата ја надминува проценетата вредност утврдена за оваа јавна набавка. За разликата во висината на двете понуди, пред донесување на одлуката за поништување на постапката се прибавени и соодветни мислења од Бирото за јавни набавки и Народната банка на Република Македонија“, велат од ресорното Министерство. Оттаму додаваат дека по истекот на рокот за жалба на решението за поништување на постапката, огласот ќе биде повторно објавен, што се очекува да биде во текот на следната недела. Од понудувачите Владата бараше да имаат најмалку 5 изработени студии за гасификација со слична содржина и обем во последните 5 години (од кои најмалку 2 треба да се со меѓународно искуство), во последните 5 години да има искуство во проектирање на гасни инсталации (нископритисни гасоводи и гасни инсталации во индустрија), најмалку 10 проекти за што како доказ треба да достави потврди од нарачател за квалитетно извршени услуги.