„Огнените“ на нова средба со лидерот на ДУИ, Ахмети негира „двојни аршини“
Објавено во: Македонија 29 Јануари, 2023
Изет Меџити, неформалниот лидер на „огнената грула“ и Муса Џафери, заедно со Блерим Беџети и Невзат Бејта утре ќе одржат собир со структури на ДУИ и граѓани во Кичево, каде ќе имаат средба и со лидерот Али Ахмети. Според пишувањата на медиумите, средбата треба да се одржи во Зајас.
Вечерва Ахмети на собир со бизнисмени во Тетово, призна постоење на група во партијата со која „постојат недоразбирања“ и нагласи дека е „искрен со сите во ДУИ'.
- Од 'групата на Муса' многу се зборува, де ова не го прави Али, де она не го прави...Браќа, не бива политика со двојни аршини. Јас не сум човек кој едно зборува, а друго работи, зашто тоа претставува лицемерие. Верувам дека моето 40-годишно ангажирање даде доволни докази дека јас директно зборувам и се обраќам. Тоа и на Црвенковски, потоа на Груевски и на Заев сум им го кажал, како и на НАТО и на ЕУ, дека тој што го гледате на телевизија, тој со кого разговарате на телефон, тој е истиот Али Ахмети и кога директно разговара со вас и комуницира со луѓе. Но, што да се прави, таква е ситуацијата. Грешат“ - рече Ахмети на прашањето за проблемите од „групата на огнените“, објавува МКД.мк.
Воедно Aхмети најави дека утре ќе има собир со граѓани и сопартијци во Боговиње.
Инаку, Ахмети на средбата со група бизнисмени од Тетово зборувал и на други теми, при што нагласил дека секогаш се залагал за каузата на Албанците, но и дека отсекогаш ја бранел, како што рече, каузата на Македонците.
- Сум бил и натаму ќе бидам ангажиран во одбрана на каузата на нашите сограѓани Македонци, на нивниот идентитет, јазик и култура - посочи Ахмети притоа додавајќи дека заедно сите граѓани на земјава треба да се сплотат кон целта за добивање членство во ЕУ.