ОПЕК ја намали прогнозата на светската побарувачка на нафта

Добивај вести на Viber

Организацијата на земјите извознички на нафта ја намали среднорочната прогноза на светската побарувачка на нафта по растечката загриженост за економскиот раст, пред се во еврозоната.

ОПЕК во годишниот извештај „Можностите за светскиот пазар  на нафта“ прогнозираше дека побарувачката на нафта во светот до 2016 година ќе достигне 91,8 милиони барели дневно.

Каретелот во 2011 година проектираше дневната побарувачка на нафта во светот во следните четири години да изнесува 92,9 милиони барели.

ОПЕК исто така ја намали прогнозата на долгорочната побарувачка на нафта и сега очекува дека таа ќе изнесува просечно 107,3 милиони барели дневно до 2035 година, што е 2,4 милиони барели дневно помалку од минатогодишната проекција од 109,7 милиони.

Главната причина за ревидирање на прогнозата е технолошкиот развој, кој особено влијае на секторот на транспорт, како и повисоките цени на нафтата.

Но ОПЕК и натаму очекува пораст на светската побарувачка на нафта во следните две децении, при што до најголем пораст, како на среден, така и на долг рок ќе дојде во Азија.

Овогодишната побарувачка е проектирана на 88,81 милион барели, а во 2013 година на 89,60 милиони.

Картелот прогнозираше дека барел ориентациона испорака на сурова нафта ќе чини 155 долари до 2035 година во споредба со сегашната цена пониска од сто долари.

ОПЕК исто така прогнозираше дека фосилните горива ќе останат главен извор на енергија во текот на следните децении, при што уделот на јагленот ќе се зголемува, а на нафтата ќе се намалува.