Опозицијата обвинува за расипништво во Општина Центар, од власта се правдаат: Ние градиме!

Добивај вести на Viber

Денеска опозицијата излезе на протести пред Општина Центар, за која како што велат, стана симбол на непродуктивно и неразумно трошење на парите на граѓаните, пред се преку проектот „Скопје 2014“. Според Андреј Жерновски, лидерот на ЛДП кој требаше да биде и кандидиран за градоначалник на Центар од страна на „Сојузот за иднината“, ваквото однесување е недозволиво. „Ние сме против ова расипничко трошење на народните пари и како што знаете, тоа беше една од главните причини за нашето спротивставување на 24 декември, кога опозицијата сакаше да го стопира ова неразумно трошење кое што води кон дополнително задолжување на државата, односно дополнително трошење на парите на граѓаните", изјави  Жерновски пред влезот на Општината. Тој исто така потсети дека според сите анкетите, најголемиот број на граѓани се против проектот „Скопје 2014". „Многу одамна граѓаните на Центар упатија јасна порака дека не се согласуваат со овој начин на водење политика и со ова економско пропаѓање, како на државата, така и на граѓаните", истакна Жерновски и порача дека граѓаните на Центар со бојкот на локалните избори ќе дадат јасно до знаење дека не се согласуваат со расипничко трошење на парите и со овој режим во Република Македонија. Писмена реакција од ВМРО ДПМНЕ Попладнево со писмено соопштение,  најголемата владејачка партија реагираше на денешната изјава на лидерот на ЛДП пред општина Центар. Од ВМРО ДПМНЕ обвинуваат дека  дека и по 15 години во политиката, Жерновски не може да се пофали со ниту еден проект со што и помогнал на својата општина. „За успешноста на Општина Центар говорат делата кои се имаат реализрано само од локалната самоуправа  во овие изминати четири години. За граѓаните на Центар се изградени катни гаражи и нови паркинзи  со цел да се намали недостатокот на слободни паркинг места. Реконструирани и обновени се 15-тина улици. Изградени се нови пешачки патеки и тротоари. Реконструирани се и обновени објектите на речиси сите основни училишта и детски градинки на територијата на општина центар. Изградени се нови детски и спортски игралишта. Поставена е урбана опрема и холтикултурно се уредени голем број простори. И уште многу други проекти кои се во директен интерес на граѓаните и одговор на нивните барања“, стои во реакцијата.