Опозицијата се дигна на нозе, вечерва протести низ цела Македонија!

Добивај вести на Viber

Опозицијата најави нов отпор против власта, со напуштање на Собранието и излегување на улица. Вечерва  од 18 до 18.30 часот, коалицијата „Сојуз за иднина“ низ градовите организираше блокади на главните сообраќајници. Во Скопје, половина час беше блокирана крстосницата пред Рекорд, а повеќе од 2.000 граѓани го запреа сообраќајот во тоа време. „Ќе организираме и поддржуваме секаков облик на граѓански отпор и непослушност. Ќе организираме и поддржуваме секаков вид на митинзи, протести, блокади на сообраќајници. Некои од овие наши активности претходно ќе ги најавуваме, а некои од разбирливи причини не. Почнуваме од вечерва со полчасовно блокирање на клучните сообраќајници во сите градови ширум Македонија“, најави претседателот на СДСМ, Бранко Црвенковски. На блокадите беше присутно целото раководство на СДСМ на чело со Црвенковски, како и лидерите на коалицијата „Сојуз за иднина“, заедно со  лидерот на ВМРО-Народна Љубчо Георгиевски. „Сме гледале многу тепачки во парламенти, ама никаде нема пример цела парламентарна група да ја вадат со сила од Парламентт. Ако опозицијата решила да го блокира Парламентот, владата треба да ја остави таа да се компромитира во јавноста“, изјави вечерва Љубчо Георгиевски на протестното собирање на опозицијата. Освен во Скопје, блокади истовремено имаше и во Струмица, Охрид, Битола како и во повеќе македонски градови. „Вчера се потврди дека во Македонија владее режим, дека ние живееме во полициско-партиско општество. Вчера се манифестираше диктатура и насилие, насилно беа бркани новинари, беа тепани и исфрлани пратеници од Собранието, беше тепан народ, само затоа што сакаа да ја одбранат демократијата во сопствената земја“, се обрати пред Битолчани претседателот на СДСМ од Битола, Васко Ковачевски. На ваква акција опозицијата се реши како одговор на вчерашните случувања во Собранието, кога пратениците од СДСМ од страна на собраниското обезбедување беа исфрлени од Парламентот, а владеачкото мнозинство експресно го изгласа Буџетот за 2013-та. Според најавите, „Сојузот за иднина“  до петок ќе продолжи со получасовно блокирање на главните крстосници низ земјава во периодот од 18 до 18.30 часот, а за во сабота напладне е закажан масовен протест пред главното седиште на ВМРО-ДПМНЕ во Скопје.