Општина Центар и Град Скопје ќе се обидат да ги надминат недоразбирањата за паркиралиштата

Добивај вести на Viber

Јавното претпријатие Паркинзи на Општина Центар, Градот Скопје и Министерството за Внатрешни работи во следниот период интензивно ќе работат на решавањето на проблемите со паркирањето на територијата на Центар, информираат денеска од оваа општина. Во краткото соопштение не се наведуваат повеќе детали за тоа на кој начин ќе се решава проблемот со паркиралиштата во централното подрачје на главниот град и спорот што се појави меѓу Општина Центар и Градот Скопје. Неофицијално се дознава дека сепак паднала одлука паркиралиштата во Дебар Маало да не му се одземаат на јавното претпријатие „Паркинзи на Општина Центар“ (ПОЦ), кое стопанисува со нив. Од ПОЦ ќе треба да достават уредни и корегирани проекти пред да продолжат со наплата на паркингот на овие паркиралишта. Претходно, Градот Скопје ја информираше општина Центар дека поради некомлетирана документација не може да стопанисува со паркинг местата во овој дел на градот и побара општината сама да ја отстрани сигнализацијата. Доколку не го сторат тоа, инспекторите на град Скопје се заканија дека ќе ги избришат линиите кои ги обележуваат паркинг местата. Од општина Центар тврдеа дека тие за возврат од Градот ќе побараат плаќање на долговите од неколку милиони евра што градот наводно и ги должи на општината за комунални такси, односно затоа што градското претпријатие „Градски паркинг“ со години ги користи сервисните улици во Центар и наплаќа за паркирање на површина која е во сопственост на општината. ЗА ПАРКИРАЛИШТАТА ВОЈНА, ГРАЃАНИТЕ НИКОЈ НЕ ГИ ПРАШУВА!