Ордановски: Процесот на дигитализација се одвива добро и ќе стартува на 1 јуни годинава

Добивај вести на Viber

Директорот на Агенцијата за електронски комуникации Роберт Ордановски денеска оцени дека процесот на дигитализација на телевизијата што треба да стартува од 1 јуни годинава се одвива добро и најави дека од технички аспект се ќе биде завршено до крајниот рок.

- Сакаме целиот процес на префрлање на дигитална платформа да го направиме така што крајните корисници да не го почувствуваат преминувањето од аналоген на дигитален сигнал. Во добра фаза сме и очекувам дека во наредниот месец и половина од техничка страна ќе биде завршен целиот проект и оти на 1 јуни ќе направиме исклучување на аналогните предаватели, изјави Орданоски, одговарајќи на новинарски прашања по денешната презентација на новата мерна опрема на АЕК.

Појасни дека за новиот дигитален сигнал потребно е граѓаните да имаат дигитален телевизор или соодветен ресивер кој на социјалните случаи, како што најави Владата, ќе им биде доделен бесплатно, а останатите ќе може да го купат за цена од околу 10 евра.

Со дигитализацијата граѓаните ќе имаат можност да гледаат 15-тина програми со квалитетен сигнал, односно програмите на четирите национални телевизии, трите канали на националниот сервис и регионални телевизии.