Отфрлена кривичната пријава за екс-министерката Нина Ангеловска за „Еуростандард“

Добивај вести на Viber

Кривичната пријава е отфрлена и Основното јавно обвинителство нема да постапува понатаму за случајот за поранешната министерка за финансии Нина Ангеловска во врска со повлекувањето на своите депозити од пропаднатата „Еуростандард банка“.

- Постапувајќи по насоките на Вишото јавно обвинителство Скопје, надлежниот јавен обвинител од Основното јавно обвинителство Скопје ги презеде сите дополнителни дејствија со цел утврдување на сите неопходни факти и донесување соодветна јавнообвинителска одлука во предметот за кој покажувате интерес. Потоа повторно беше донесено решение за отфрлање на кривичната пријава, бидејќи во пријавените дела не беа утврдени елементи на кривични дела кои се гонат по службена должност. Вишото јавно обвинителство го потврди донесеното решение и тоа е правосилно, гласи одговорот од ОЈО кој го доби „Фактор“.

Левица на крајот на 2020 до Основното јавно обвинителство поднесе кривична пријава против eкс министерката за финансии, Нина Ангеловска за Еуростандард банка, бидејќи додека била на функција, според партијата, злоупотребувајќи инсајдерски сензитивни информации го повлекла својот депозит од 250.000 евра. 

Тоа се случи непосредно пред банката да пропадне, со што таа наводно ја искористила службената положба за остварување лична корист и се поставила во привилегирана и фаворизирачка позиција во однос на останатите доверители.

Кривичната пријава на Левица беше првично отфрлена од страна на Основното обвинителство, но во текот на летото 2021 Вишото обвинителство ја прифати поднесената жалба и ја врати кривичната пријава.
Вишото јавно обвинителство Скопје, согласно своите законски надлежности, по увидот во жалбата и списите од предметот донесе Решение со кое жалбата ја уважи и го задолжи Основното јавно обвинителство Скопје да ја продолжи постапката со цел утврдување на сите неопходни факти и донесување соодветна јавнообвинителска одлука која ќе произлезе од утврдените факти и докази.

Антикорупциската комисија во август 2020 отвори предмет не не покрена барање за  санкција против министерката за финансии Нина Ангеловска откако го разгледале предметот за можен судир на интереси со стечајот на Еуростандард банка и нејзиниот депозит во банката. 

Беше препорачано да се доуредат прописите, посебно меморандумот за соработка помеѓу Народната банка и Министерството за финансии и останатите регулаторни тела, со тоа што ќе се додадат уредби со кои ќе се регулира судирот на интерес.