Откуп на земјиште под легализиран објект и без урбанистички план

Добивај вести на Viber

Откуп на земјиште под легализиран објект и во случај да не е донесен урбанистички план ќе се овозможи со законските измени  на Законот за градежно земјиште, што ги усвои Владата.

- Ова беше  едно од поголемите барања на граѓаните кои веќе си ги  легализирале објектите, бидејќи некои од општините, особено руралните, немаат донесено детални урбанистички планови. Со ова им излегуваме  во пресрет. Со измените на Законот се овозможува и во случај да нема детален урбанистички план граѓанинот што има легализирано објект првин да си го откупи земјиштето под објектот. Кога ќе се донесе планот ќе може да го откупи и останатото земјиште, рече министерот за транспорт и врски Миле Јанакиески денеска на прес-конференција.

Тој презентира измени на законите за градење и за градежно земјиште, со кои очекува потранспарентни и поефикасни процедури во процесот  за издавање одобренија  за градење и во постапката за продажба на градежно неизградено земјиште.

Со законските измени, исто така, се дава можност да се воспостави службеност на  државно неизградено градежно земјиште, пред се за инфраструктурни објекти, како што се малите хидроцентрали.

Покрај одобрението за градење кое од 1 јуни се издава електронски, на таков начин ќе се спроведуваат и останатите постапки предвидени со Законот за градење, како што се одобренијата за реконстукција, за доградба...

Со предложените измени на Законот за градење,  како што рече Јанакиески, се овозможува од 1 ноември годинава целиот систем за одобренија за градење да биде по електронски пат, за што веќе се изготвува софтвер. По електронски пат досега се издадени пет одобренија за градење,  со просечен рок од 25 дена. Претходно одобренијата се издаваа во просек за 45 дена.

Според Јанакиески, генерално сите општини се подготвени за електронско издавање на одобренијата. - Кај дел од општините има неподготвеност  и проблеми, но нема да се откажеме од овој процес. Организиравме обуки  за општините и генерално сега сите се подготвени за издавање одобренија за градење. Уште на почетокот кажав дека  ќе има мали проблеми, но ги решаваме  во од. Генерално системот е одличен, над 90 проценти од општините се подготвени и нема некој поголем застој во издавањето одобренија, рече Јанакиески.

Значајна новина што се предлага со законските измени, како што информира, е што при процесот на продажба на градежното државно земјишпте по електронски пат ќе се доставуваат и апликациите.

Општините и Министерството за транспорт и врски се обврзуваат целокупната документација, како што е извод од план, нумерички податоци, имотен лист... да биде на веб апликацијата. Доколку не се ставени  тие документи самиот софтвер нема да овозможи почеток на јавното наддавање. И следењето на постапките да биде по електронски пат, наведе Јанакиески и додаде дека  по електронски пат  ќе се одвива и постапката за дооформување на градежните парцели.

Новина е и тоа што во случај на раскинување на договор 80 проценти од уплатените средства за земјиштето нема да бидат вратени. Досега се враќаше целиот износ на уплатени средства.

Министерот Јанакиески очекува предложените законски измени да бидат усвоени од Собранието најдоцна до крајот на октомври годинава.