Отворен нов клуб на пензионери во општина Центар

Добивај вести на Viber

Градоначалникот на општина Центар Владимир Тодоровиќ денеска го отвори петтиот клуб на пензионери, лоциран на улица „Водњанска“ број 28, во реновираните простории на урбаната заедница „Кочо Рацин“. Клубот е со површина од 46 метри квадратни и ќе  работи од понеделник до петок, од 10 до 14 часот.

Извршена е реконструкција на просториите и пензионерскиот клуб е комплетно опремен и содржи просторија со маси и  столчиња, има реквизити за социјални игри – табла, шаховски и домино комплети, кујна и тоалет, обезбедени од општина Центар.

- Општина Центар постојано ги следи потребите на граѓаните и се труди секогаш да им излезе во пресрет. Пензионерите од општина Центар во никој случај не треба да бидат заборавени и ние како општина се трудиме да им обезбедиме содржини кои ќе им бидат интересни, места што ќе претставуваат забавно катче каде пензионерите ќе се среќаваат, ќе се дружат и квалитетно ќе го поминуваат слободното време, рече Тодоровиќ.

Со отворање пензионерски клубови, нагласи Тодоровиќ, ја покажуваме потребната грижа и помош за оваа категорија на граѓани.

- Општина Центар има развиено дологорчна стратегија чија крајна цел е овозможување што поудобен живот на луѓето што ни ја оставија општината во наследство, изјави  Тодоровиќ.

На отворањето на клубот присуствуваа претседателот на Сојузот на пензионери на Град Скопје, Крсте Ангеловски и претседателот на Здружението на пензионери на општина Центар, Павле Спасов.