Отворен новиот објект на Стариот театар во Скопје

Добивај вести на Viber

По неколку години одложување, а како дел од проектот „Скопје 2014“ денеска свечено беше отворен Стариот театар во Скопје. На отварањето присуствуваше целиот политички врв, но и голем број уметници и луѓе од фелата. За министерката за култура Елизабета Kанческа-Милевска, изградбата на театарот е гордост за цела Македонија. „Во изградбата на овој театар е вложена голема посветеност, многу енергија и љубов, големо знаење на многу луѓе, голема поддршка од граѓаните, разбирање на политичките структури и најважното – голема љубов од сите нас заедно. Македонија денеска се препознава како среќна театарска земја“, изјави Kанческа-Милевска. На ова се надоврза и премиерот Никола Груески кој додаде дека стариот театар е дел од колективната меморија на сите носталгичари. „Новиот театар ќе го негуваме како универзално средство за зајакнување и за претставување на нашите уметнички способности во целиот свет. Најзаслужни за тоа што е изграден се граѓаните на Македонија. Денешниот датум ќе остане со златни букви во поновата културна историја на Македонија“, изјави Груевски. Според директорот на МНТ, Дејан Лилиќ,  пет децении МНТ и публиката беа во потрага по новиот дом, а стариот театар за Лилиќ, отвора нова страница од театарската историја. Стариот театар е изграден на кејот на реката Вардар од левата страна, на местото каде што до земјотресот постоеше скопскиот театар.Иако според првичните најави требаше да чини 6 милиони евра, неколку години подоцна сумата рипна на најмалку 20 милиони евра.