Панзова: Работата со деца на брод е прекрасна, а заработката е солидна
Објавено во: Економија 22 Јуни, 2016
Дваесет и осумгодишната Лилјана Панзова од Велес е дипломиран педагог и веќе три години работи на брод со деца на возраст од 6 месеци до 17 години.
Ангажирана е преку компанијата Royаl Caribbean International, и е презадоволна од ова искуство. Младата велешанка раскажува дека заработката е солидна, месечно се заработува од 1500 до 2000 долари, а за сите вработени е обезбедено сместување и храна. Вели дека на брод се работи многу, посебно додека бродот плови, но работата сепак ја исполнува.
„Се работи од 5-9 часа дневно, зависи дали пловиме или сме на копно. Кога пловиме сите гости и деца се на бродот и се работи од 6-9 часа, а додека сме на копно е порелаксирано затоа што повеќето гости се надвор со децата и тогаш ние имаме повеќе слободни часови. Од искуство можам да кажам дека работата со деца на брод е прекрасна, исполнета со смеа и веселост. За време на празници кога бројот на деца е доста зголемен, работата знае да биде и доста стресна меѓутоа никогаш не си сам, колегите си помагат едни со други, има меѓусебна почит, поддршка и разбирање што е од големо значење во тие понапорни денови“ - објаснува Панзова.
Само еден договор на Панзова и траел 5 месеци и преку него имала можност да работи со деца од различни возрасти.
„Додека децата се оставени во игротеката на брод, ние сме одговорни за нивната безбедност и за тоа да не останат гладни, така што ги носиме на ручек и на вечера во ресторанот во посебен оддел за нив. Како дополнителни активности можам да споменам дека се работи на вртелешка или базен на поголемите бродови, но само еден час дневно. Работиме во ВИП секторите во театрите каде скенираме резервации на гостите, на карпа за качување ( на помалите бродови) и тоа еден час , исто така се работи по час-два на самиот влез на бродот кога гостите доаѓаат за прв пат каде им даваме првични информации“ - рече Панзова.
За сите млади кои сонуваат за ваква работа, вели дека ова е одлична можност да се заработи, да се прошета и да се стекнат контакти со луѓе од различни страни на светот.
„Се работи во мултинационална средина каде поголем број од вработените се млади и секогаш расположени. Обезбеден е престој во кабина која што се дели со уште една личност, најчесто колеги или колешки од работа што е од големо значење бидејќи тие луѓе со кои работиш се твое семејство додека си таму и никогаш не си осамен, освен кога не фаќа носталгија , што е нормално. Но, секој втор ден се разбудуваш на нови места, градови, држави и тагата ја снемува. На сите млади од срце им препорачувам да соберат храброст и да одат барем еден договор на брод, да посетат преубави места и да заработат повеќе отколку во нашата Македонија, а воедно и да се усовршат на професионално ниво и да се стекнат со нови вештини“ - вели Панзова.
Во текот на работата најмалку работела со тинејџери, но вели дека ова искуство и работа со деца и помогнало за професионално усовршување.
С.А.