Партиските истражувачки центри чекор поблиску до државните пари

Добивај вести на Viber

Предлог-законот за партиски истражувачко-аналитички центри, поднесен од група пратеници беше прифатен од Собранието и продолжи на второ читање. Новиот Предлог закон предвидува партиите со државни пари да формираат аналитички центри, а парите ќе може да ги користат за испитување на јавното мислење за своите партии, за спроведување дебати и трибини, но не и за партиски активности.

„Со овие промени на законот, крајно необјективно, селективно, се форсираат само четири политички партии да бидат финансирани нивните истражувачки центри од страна на буџетот, државата, од парите на граѓаните. Ваков законски проект сега, во услови на тешки економски и финансиски состојби не и е потребен на Македонија“, рече пратеникот Павле Трајанов од Демократски сојуз.

Според него, нема реални критериуми врз основа на кои ќе се финансираат политичките партии за формирање центри за истражување и анализирање.

Претседателот на Парламентот Трајко Вељаноски рече дека ќе дискутираат по Предлог-законот за изменување и дополнување на Законот за јавен долг, во прво читање, поднесен од група пратеници од опозицијата, откако ќе го разгледаат работните тела.

Во попладневниот дел од денешната седница на законодавниот дом поддршка добија предлог-законите за изменување и дополнување на Законот за придонеси од задолжително социјално осигурување, за високото образование, за ученичкиот стандард, за државните службеници, за јавните службеници, за пензиско и инвалидско осигурување, сите по скратена постапка.

Собранието ги донесе и Предлог-законoт за студентскиот стандард, Предлог-законот за изменување на Законот за социјална заштита, како и предлог-законите за дополнување на Законот за Владата на Република Македонија и за внатрешна пловидба, сите по скратена постапка.