ПЕНДАРОВСКИ ГО ЧЕСТИТА ПРАЗНИКОТ: Tреба повторно да го обновиме единството што го имавме
Објавено во: Македонија 08 Септември, 2019
Шефот на државата, Стево Пендаровски по повод 8 Септември, Денот на независноста упати честитка до граѓаните.
Во неа наведува дека во 1991-та, во неизвесно време, се обединивме околу идејата за своја, независна држава.
Вели дека тогаш, големиот предизвик, наместо причина за поделби, стана повод за обединување, сите се собравме околу идејата за независна и суверена Македонија, порачува шефот на државата.
„Низ годините имавме и подеми и падови, и грешки и успеси, но, заедно, ги надминавме сите искушенија. Во 1991-та одбравме независност, во 2001-та меѓуетнички соживот. Денес сме пред портите на европските и евроатлантските институции. За да стигнеме до целта, треба повторно да го обновиме единството што го имавме на почетокот на независноста. За тоа ни е неопходно граѓанско помирување, а за трајно помирување потребна е ефикасна правда и државни институции со интегритет. Ако сакаме младите генерации да останат во земјата и тука да живеат, да работат и да создаваат иднина, мора да се потрудиме многу повеќе како држава и да им обезбедиме услови да се реализираат и да успеат дома, во својата земја. Нашата различност е нашата привилегија. Колку поразлични сме, толку побогат и поубав ќе биде нашиот заеднички дом. Да градиме заеднички држава во која сигурно има место за сите нас, да градиме општество ослободено од предрасуди. Држава и општество во која има продуктивен политички дијалог, социјална правда, солидарност кон ранливите и заборавените, во која и државата и граѓаните се грижат за животната средина. Држава во која владее правото, во која истите правила важат за сите нас, и за силните и за слабите, и за моќните и за немоќните, и за власта, и за опозицијата“, наведува Пендаровски.
Вели дека треба да имаме држава во која ќе се признаваат грешките и ќе се честитаат успесите и според него само таква држава ќе има сигурна и просперитетна иднина.